Cryptofriûl a Listize ai 9 di Avrîl

Doi agns indaûr, a inizi 2020, o jerin bielzà pronts par un event peât a Bisest, il libri che al à vinçût il Premi San Simon dal 2019. Al jere nuiemancul che il 29 di Fevrâr, il dì in spirt, e nie… dutis lis manifestazions o i events a son stâts sierâts propit a scomençâ di chel dì, dant l’inviament a chescj doi agns di pandemie.

Ven a stâi che Bisest al è stât un libri cence code, dulà che dut si è sierât cun l’inizi dal 2020. Tal 2021 il libri che al à vût bon acet al è stât Cryptofriûl, e ancje chi, daspò de serade di Otubar, ai 28, dut si è fermât une altre volte par vie de gnove onde de pandemie. Ma se vacine e vûl si pues tornâ a tacâ a fâ robis.

Si che duncje, pûr pûr che al sarà un mês straplen di casins, ve chi il prin event dal an!

Al è saltât fûr inte suaze dai festegjaments par la Fieste de patrie furlane, che e cole juste vuê. A àn metût dongje la robe i Comuns di Talmassons, Listize e Cjasteons, ma al è chel di Listize che al à il mani in man. E difati, SABIDE DI SERE, AI 9 DI AVRÎL, LI DE BIBLIOTECHE DI LISTIZE, e sarà une serade che e à come titul la presentazion di Cryptofriûl, chest libri une vore scalembri che al met dongje fats e personis dal secul passât cun bestiis misteriosis e un piç di fantasie.

Come par solit, o savês che lis presentazions di libris mi fasin cagâ, se a son stufadicis e gnegnosis. Si che, se mal permetin, o cirarai di meti dongje la scuadre di Contecurte, par fâ deventâ la serade un pôc plui vivarose e scoltâ cualchi storie, o cualchi toc di alc, ce saio.

Insome… se o vês let il libri, passait a fâ un salût che magari a scuvierzês alc che no savevis. Se no vês let il libri, ben po, disarès che no je miôr ocasion par vignî a viodi se us interesse di leilu. 🙂

E se o vês voie dome di sparniçâ, ve chi l’event su facebook–