gelostellato 3 Luglio 2023 Zumiele di une man sole La lune usgnot Samee une zumiele Di une man sole che e cîr Di cjapâ sù il scûr. Cuissà Se i restarà jenfri dai dêts Une stele Un planet O la mê cjalade crote Plene di siums? Cuissà se invezi E vûl dome messedâ Il marum de gnot Par che masse nol pesi Sui nestris cussins O sui bleons vuarfins Des taconadis No fatis o fatis mâl e mâl Passudis. Te tace dal sigûr Il cîl al è blâf No si viodin dincj o sgrifis No cole samence e nol è Nissun che nus cridi Se stin cuiets Ma forsit noaltris Fats come che savìn di jessi fats Fîs di fastidis che intiessin La pâs no le cognossin E dut câs Le vendaressin.
