Benvignûts!

Se sês rivâts drets a chest articul al vûl dî che us è rivade une mail dulà che us disevi che o ai viert un sît e us invidavi a vignî a torzeonâ chi dentri. E se in chê mail o vês fracât il leam che us devi il benvignût par furlan – no crôt che o sedis in tancj – o speri che o vedis gust di viodi che chest al è un sît avonde bilengâl. Ma scomencìn par ordin.

PRIME ROBE, prime che o pensedis che us ai fat une malegracie: dulà aio cjolt la vuestre mail e parcè us aio scrit?

Bon… In gjenerâl o podaressin dî che al è che us ai scrit parcè che mi faseve plasê, ma lis rispuestis a cheste domande a podaressin jessi tantis e in cualchi câs a sarà juste plui di une, o forsit ancje dutis. Provìn a tirâ dongje un pocjis:

1. o seguivis il gno blog gelostellato e magari o vês partecipât a cualchidune des coionadis cun stîl che o vevi fat culì (ce saio, il fun cool, i libris PSF, i libris PEM, la gelotteria… insome, a jeris jenfri i strafighi che seguono questo blog. E jo us vevi metût tal gno file di “Scellerati” che dopravi par mandâus i inzornaments.
2. O seguivis il blog par furlan, chel che si clamave Salvadeat (e prime ancjemò Cîl glaçât), magari dome par viodi i cartei dal Stadio par furlan.
3. O pûr o seguivis i pensieri di gelo, cu lis sôs quasi poesiis par talian, che mi robavis par fâsi molâ dai morôs, o che magari cuissà, us plasevin pardabon.
4. O pûr o sês int di Contecurte, e a jeris te liste viere di chêl blog, che cumò al è un sît cu la sô mailing list (anzit, se no sês iscrits, iscriveitsi ancje a Contecurte dai!).
5. O sin vignûts in contat par vie di libris: chei che o ai scrit jo, chei che o vês scrit voaltris, chei che us ai o mi vês regalât, chei che mi vês o us ai presentât, chei che mi vês o us ai corezût, chei di Edizioni XII o i miei che us ai vendût… insome: o sin int che nus plâs lei e scrivi.
6. O pûr e je cuistion di contis. Si sin barufâts o lets o corezûts tai forum, tes garis di scritôrs, o sês stâts coinvolzûts te racuelte di contis dai Corti di Edizioni XII o insome… cuistion di contâsale.
7. O pûr, plui facil, si cognossin o si cognossevin, magari sin amîs, parincj, ex-students, o vin lavorât tal stes puest, sin lâts a bevi insieme o nus plasarès lâ, vin fat l’amôr o nus plasarès fâlu, lis nestris vitis si son tiradis dongje par un ciert timp, nus plasin o no sopuartin lis stessis robis, insome… o vevi la vuestre mail e o ai pensât che us fases plasê ricevi cheste gnove e savê di chest gnûf sît. Si, lu sai, tantis mail a tornaran indaûr, altris al sarà come no vêlis mandadis, altris ancjemò a àn cambiât vite o mont.  No impuarte. O ai gust di scrivi a ducj distes.
8. Altris che cumò no mi vegnin tal cjâf o ai miôr dismenteâ. 🙂 Ma al è plui facil che se no jentrais in nissune de categoriis che o ai dit o sês capitâts achì par câs, o cirint porcariis su google.

SECONDE ROBE, intal câs che o sedi contents di jessi capitâts achì. Insom insom, ae fin de pagjine (o dal telefonut), si pues iscrivisi ae NEWSLETTER, par savê une volte ogni tant ce che al ven publicât achì e soredut par ricevi regâi e piçulis perfidis maraveis. Anzit: o ai bielzà preparât un regâl par ducj chei che si iscrivin te liste. Insome, meteit il non, la mail e fracait sul leam che us rive in rispeste, cence fastidis: no ai interès nancje pe mê vite, figurinsi se mi fâs i fats vuestris. Però o ai gust di regalâ storiis, ogni tant, e ae fin, scrivi al è biel ancje cuant che si trate di scrivi une letare a tancj e a di nissun, come che a son i articui di chest sît.

TIERCE ROBE, e ultime, trancuii: CHEST SÎT. Cemût isal fat, cemût si doprial, ce cjataiso dentri… Alore. Al è un sît di un scritôr e o cjatais la pagjine che us conte alc dai miei libris (Opere) dulà che us conti di lôr, par talian e par furlan. Dopo e je la sezion dulà che o cjatais dutis lis robis che o scrîf jo, ven a stâi lis robis su lis cuâl o ai il copyright. Si clame Storie e pensieri, e o podês lei contis, poesiis e pensîrs. Se us interesse alc in particolâr di cheste sezion, fracait sui tag, che o cjatais adalt. Dopo o cjatais la sezion Par furlan, dulà che a son ducj i post scrits par furlan, sedin robis scritis par furlan, contis o poesiis o haiku, sedin fufignis come i cartei dal Udin (che o ai tacât a meti sù), o gnovis che mi capitin. La sezion plui gruesse, clare, e je chê dulà che us feveli di libris. I libris che o lei, che a son pûr trop simpri mancul, ma ancje lis robis che o ai fat che a rivuardin i libris, e che magari us fâs plasê recuperâ, tipo i libri PEM o PSF. La sezion si clame Di libri (e altre perfide meraviglie).

Ultime sezion, il take away, cu lis contis di scjamâ in pdf. Par cumò o ai metût i miei ebook vieris, chei di une volte, e no ai metût il formât epub. Juste pdf, tant par dî che se o vuei meti un conte di regalâus o sai dulà metile.

Se us covente di cirî alc, tipo un libri o un autôr o une conte, lu cjatais cun il CERCA che e devente la funzion plui utile par navigâ dentri chest sît.

Par cui che no lu sa e nol vûl seguî il sît cu la mailing list, o viodarai di tornâ a meti in vore cun costance la pagjine facebook e il profîl twitter.

La grafiche dal sît le à fate Lorenzo Marangone, un zovin grafic e ilustradôr che o cjatais su instagram a @_lore_mrgn o tal footer. Seguit la pagjine, se us plasin i siei lavôrs.

La web master e je Astrid Virili, che o ai lambicât par un an par vê la vore come che mi plaseve a mi.

Chei di Mataran e l’artist Luca Tonin a son di ringraciâ par il regâl che al ricêf cui che si iscrîf ae mailing list chi sot.

Ultimissime robe: o sai che il sît, dentri, al varà un sac di fastidis peâts al timp che al passe e a magagnis informatichis: leams rots, download che no si rivin a fâ, imagjins corotis… Se o vês fastidis lassait un coment al articul o scriveitmi cence fastidis. Planc planc o rispuint a ducj e o comedi dut. E clare, faseitmi savê ce che us pâr tai coments a chest articul, ancje pa vê cualchi coment par furlan che al sarès biel. 🙂