Targhis e Zeis
Ma chest, une volte, al jere nassût par jessi un sît di un scritôr, ma stant che di cuant che o lavori a scuele no scrîf plui, al è un pôc deventât une fantasime, come sît. Beb… nol è propite che no scrîf plui. Alc ogni tant o rivi a butâlu jù, ancje se curtissim, e alore, une gnove, e capite.
Ve chi alore che us conti che domenie, in Vile Manin e in plen Sapori Pro Loco, o ai scuviert di jessi rivât tierç intal concors dediât a Jacum dai Zeis, figure ironiche e cognossude de storie popolâr furlane, che al veve simpri la batude pronte. La conte premiade, Aiuuuut!, e jere ancje la miôr che o vevi scrit, soredut parcè che e cjapave ispirazion di un ricuart di mê none e di une des tantis che al veve cumbinât Jacum a Talmassons. A mi mi plaseve une vore e difati le ai ancje doprade îr par leile ai fruts des mediis di Vildivar e Codroip, cussì a àn imparât cui che al jere Giacomo Bonutti!
Biel de zornade al è stât ancje che son stâts segnalâts altris contecurtârs, ancje se forsit – ma chest al è dome un parê – no je stade masse rispetade la idee di fonde di fâ omaç ae figure di Jacum stant che i premiâts, par furlan, a son stadis contis plui dongje al concet di barzelete, come chê dal predi e dal confessionâl rot, rindude inte forme di conte une vore ben e cuntune scriture siore e colorade dal vincidôr, Diego Navarria. Mi è plasude un pôc mancul chê ispirade a Pierino e la cacca, che la zonte de sgnape e il cambio di pipì tal puest de mierde no rivave a fâmi smenteâ la gag di alvaro Vitali. Ma al reste che il concors al è vignût une vore ben e o ai gust di vê ben figurât. Us lassarès la conte, ma no mi visi se si pues sparniçâle ator o mancul.
E za che le ai, ve chi che us lassi almancul la fotografie di ducj i partecipants o cuasi che a jerin a viodi.
Altre gnove, e je che doman di sere, a Listize, mi cjapi une targhe par merit e o ai une vore di gust!
Al pâr difati che intal Comun, di chescj ultins timps, si cumbine alc di bon, e se za o seguìs simpri il sport e lis impresis de mê compaesane tal judo Asia Tavano, di chês altris robis no savevi e al è simpri gust che ti dedin un ricognossiment cuant che si cumbine alc di bon.
Po dopo? Nuie, mi pâr, se us covent un gjat piçul clamait che a son pene nassûts. E vonde cussì! Tornìn a traficâ cu lis contis di chei altris!
