DONE Anatomie di une conte – gelostellato

Anatomie di une conte

Anatomie di une conte

 

Ben po. La setemane passade no ai nancje inzornât chest puar sît! O savevi che al sarès capitât, ma mi jeri imprometût di stâ atent. Però… poesiis no mi son vignudis. Di robe gnove no ‘nd ai lete, e o ai zirât par dute la setemane cuntun libri di contis di Levi che o vevi let aromai cheste Istât… Ma vuê o ai une super gnove! Bon… o vês bielzà viodude la locandine dal laboratori in dôs parts: ANATOMIE DI UNE CONTE. O ai za scrit alc su la robe achì su Contecurte, ma chi che o soi cjase mê o pues contâus ce che mi va e dîus alc di plui. Tant par scomençâ, al è stât di ridi che jo, come propueste iniziâl, o vevi dit a Serena di clamâlu “Autopsie di une conte” ma al jere in efiets masse macabri e e veve reson a cambiâ. Da rest une conte no môr mai, e al è impussibil fâi une autopsie.

Però la idee che o vevi tal cjâf e jere propite chê di cjapâ une conte – magari famose e cognossude – e provâ a fâle a tocs, par viodi ce che e veve dentri. Magari prin o dopo lu fasarai, ma al va ancje dit che par fâ chest lavôr al vûl jessi un chirurc di chei brâfs e jo ancjemò no ai studiât cetant. Però, alc sui mecanisims des storiis lu sai e alore, se o capîs avonde il furlan, us sburti a iscrivisi e partecipâ. Tant e je cuistion di une orute e mieze, cuntun pocje di teorie inte prime serade e un pocje di pratiche inte seconde. E tal mieç la idee e je che o podês costruî la vuestre storie e la vuestre trame par chê storie.

Pe part teoriche, nuie di pesant. Scuvierzìn insiemi ce che a son e cemût che si scrivin lis storiis e dopo provin a viodi un mecanisim avonde comun di scrivi une. Fasint esemplis, soredut, che cui esemplis lis robis si capissin miôr. E mi è vignût ancje un biel model par capî il nivel di grâts di libertât di une conte che si vûl scrivi.

Cui esemplis, invezit, o fasin la part pratiche. Noaltris o leìn lis robis ma magari cence dicerni che daûr a son regulis e schemis, magari aplicâts cence savênt di fâlu. Cussì soi lât a cjoli lis contis dal concors Vôs de basse, chês che a son stadis premiadis, e su chês soi lât a cirî i esemplis di robis ben jessudis intai aspiets plui impuartants par une conte curte.

Ce altri… Ancje masse, dai. Il laboratori al sarà in linee e o doprarìn Google Meet, che nus pâr che e sedi la vie plui facile e economiche par partecipâ. O stoi preparant i power point di doprât intes dôs seradis, ma o met dongje ancje un struc in pdf che al vignarà mandât a ducj chei che a si iscrivin, cussì se un al pues fâ dome un dai doi apontaments al varà in ogni câs dut ce che al è stât dit.

L’obietîf al è scrivi une conte curte e magari partecipâ al concors Vôs de Basse, (scjadince ai 17 di Mai, limit di caratars 3000 batudis) che sâstu mai di vinci un franc in libris.

Post a Comment

Questo sito usa Akismet per ridurre lo spam. Scopri come i tuoi dati vengono elaborati.