Jo no varès mai pensât
Jo no varès mai pensât
che tu tu murissis prin di me.
Tu che no tu savevis, no tu sâs,
no tu savarâs mai
ce che al è un white russian,
un black russian, une coionade di une gnot
che stoi bevint e fasint cumò
tu che tu âs sielzût ce che jo no ai volût sielzi
no
no varès mai pensât
e ducj chei chilometris
tal mieç dai bosc di sante margarite
che o vin fat insiemi
chês dôs oris straçadis a discuti
des diferencis des dôs cjançons plui cognossudis di Battiato
tu che tu vevis il mês compagn, ma il caratar diferent
tu che no tu mi vevis dât reson
come che a fasevin ducj
tu che no tu mi vevis bussât
come che a fasevin dutis
tu che no tu mi vevis
lassât restâ, come che o fasevi jo.
No varès mai pensât
che tu murissis prin di ducj
noaltris che a jerin chei che a studiavin
che a fasevin lis robis
che a no fasevin altris robis
tu che tu jeris furlane, ma no tu volevis fevelâ furlan
e nissun al pensave che al fos un dispiet
tu che tu jeris biele ma no tu ti fasevis biele
tu che tu jeris un misteri dentri un misteri dentri un misteri
e tu odeavis frasis come cheste
tu e Baricco
tu e Ligabue
tu e il bosc
tu e lis tetis platadis
tu e lis poesiis di Sereni
de Merini
tu e il teoreme che o jerin dongje a definî,
e che cumò il timp al varès strupiât.
Jo
Jo che no varès mail pensât
che tu murissis prin di me, cul dispresit
che mi à simpri fat mâl
se al jere il tô.
Mi restin lis letaris, la tô caligrafie taronde,
come la muse
come la vite che si viodeve che tu volevis fâ sù.
Jo cui miei cjantons
i pecôi
lis sgriadis
lis bozis
o jeri la robe plui lontane di te e lu savevin,
jo e tu,
che no tu varessis mai pensât, soi convint,
di murî prime di me.
E cumò che tu sês muarte
Prin di me
O pues diti dut ce che soi sigûr che al sedi vere
Che ti sarès plasût
James Blake, Mattotti, Zerocalcare, banksy e Eugenio in via di gioia
che no ti sarès plasude la trap, murubutu, cori sui cavalcaviis,
cu la machine, di cjocs.
E ti sarès plasût Bon Iver, Paolo Nori, Vasco Brondi solist,
ma no cun dutis lis robis.
