DONE “discorint par furlan” – conversaciones partecipativas – gelostellato

“discorint par furlan” – conversaciones partecipativas

“discorint par furlan” – conversaciones partecipativas

Alore… Ae fin dal an passât, viers dicembar, al è stât un moment che o jeri pardabon stuf. O feveli soredut dal lavôr, in bande de situazion pandemiche e di dut il rest. O soi stât un che simpri al à cjatât il timp di gjavâsi vie ancje cinc minûts di zornade par regalâsi e regalâ alc di biel. Sedi scrivi alc, lei cualchi rie, inzornâ un blog, fâ un zîr pai cjamps… ben po, cumò, ma ancje a dicembar, o stoi lavorant 8-9 oris in dî di lezion, paiât une miserie, e o rivavi cjase cul cjâf cetant strac che la uniche idee e jere che di bevi e cjalâ il mûr. Alore, soi lât a licenziâmi, e che e je une robe che o ai fat. No che o puedi permetimi di licenziâmi, clare, ma soi lât a dîs al paron che o mi met a cirî un altri lavôr. Bon. In chei stes dîs o ai ricevude une mail di Auguris di Eduart Baschera, de Argjentine, che al jere un pieç di timp che no lu sintivi par vie di Contecurte, e nol è râr. Contecurte e je une Osterie, e si va e si ven cence rindi cont a di nissun. Nol è strani che un al sparissi par simpri.

Insome.. le ai fate lungje. Ma ta chê mail di Eduart – che e jere une des plui bieli, anzit, cence dubi la plui biele dal an – a jerin scritis un pocjis di robis de sô vite ma soredut e jere dentri une vore di voie e di morbin di fâ robis bielis, cun dut di ce che ti capite intor e dal timp che spes a no si à. Si che, di chê volte, o ai cirût di tornâ a cjapâ in man chel pôc timp che mi vanze fûr dal lavôr (e o lavori simpri masse, e simpri paiât di bant) e dentri di chês altris robis o cîr di stâi daûr sedi a Contecurte, sedi a chest sît che o stês leint e che mi permet, lu stês leint, di sparniçâ lis gnovis che mi rivuardin.

E cheste gnove e rivuarte propite la Argjentine, Eduart e i Fogolârs furlans. E contecurte ancje.

No stoi a dîus ce che o pensi di dut chest parcè che un che al seguìs lis robis in Friûl al pues ben viodi la diference. Pai furlans, la plui part, la lôr lenghe, li personis come me che le doprin, o a fasin robis artistichis come scrivi o ancje dome tignî un sît come Contecurte, a valin ben pôc. No meretin il timp par fâ un banner di reclam come chest ca parsore, no valin une condivision, no valin soredut une robe: Entusiasim. Eco, jo, tes robis che a fâs a ca, no cjati cuasi mail la gjonde, il gust di fâ. E no jentre dome la lenghe, eh… al è propite une maniere di vivi diferente. I students argjentins dal cors Furlan Zero a àn tacât a lei e fevelâ e scrivi par furlan cence cognossilu, recuperant la lenghe dai vons. E al è une maravee ricevi lis lôr contis e viodi cemût che daûr al sedi entusiasim e il gust. Bon… insome. Se o sês furlans di chenti, probabil che no vedis capît ce che o intint, parcè che aromai o intindin il gust des robis come alc di pierdût ancje se o sin pronts a dî che no je vere.

Ve chi… al veve di jessi un post di reclam e mi soi pierdût vie a contâ chê dal ors. Alore fasinlu il reclam!

Sabide di sere o sarai su google meet a fâ une cjacarade cui furlargjentins, aes 10 di sere ore di chenti e 18 di là vie. No ai preparât nuie, e facil che no rivi a preparâ nuie. Ma insome… o sai che o ai une vore di gust di fâ cheste cjacarade!

Ps. no sai se podevi pandi chest incuuintri, ma o crôt di sì. Se nol fos cussì Eduart mi sbilfarà, ma no ai pôre di lui. 😛

pps. La imagjin no jentre nuie, ma o ai comprât un libri par fruts bielonon e o vevi voie di meti un pôc di colôr e un drâc ta chest post, ancje parcè che chest sît al è nassût par condividi “robis bielis”. 🙂

 

Comments

  • Marcelo del Mestre
    18 Febbraio 2021

    Al È un drâc straç🤣…dome tu…abracjs di cûr…cividin sabide…(chest Al È un des problemis che o Ai Trovât chi…prime letare di ogni peraule il met maiusculis…

    reply
      • Marcelo Del Mestre
        21 Febbraio 2021

        Graciis dal to timp cun nô vue!…o devi jessi sicur che corbe al Volê Dî “Menabighis”…podesistu spiegâmi il Concet?
        Graciis!…al è stât un plasè pardabon!

        reply
        • Marcelo Del Mestre
          21 Febbraio 2021

          Che robis al volê dî

          reply
          • Marcelo del Mestre
            23 Febbraio 2021

            Graciis!…alore al diventara il gno prosim nick-name or non utent 🤣

          • Marcelo del Mestre
            23 Febbraio 2021

            Une robe cence relazion: il font che tu ai doprât par chest sit e je une vore biele: Cemut si clamie?…graciis

          • Astrid
            24 Febbraio 2021

            Mandi Marcelo! Il font si clame Cormorant Garamond e si pues discjamâlu di rive in jù dal sît di Google Fonts https://fonts.google.com/specimen/Cormorant+Garamond?preview.text_type=custom

  • Astrid
    21 Febbraio 2021

    Par me al è stât bielissim sintî fevelâ furlan cul acent de Argjentine! E cognossi la storie dai nestris emigrants.

    reply

Post a Comment

Questo sito usa Akismet per ridurre lo spam. Scopri come i tuoi dati vengono elaborati.