Al è facil e dificil, fevelâ di Lis Contis dal Mês, libri che al à tant che autôrs jo e Serena Fogolini, ma che daûr al à une storie une vore, ma une vore lungje e plene di cantins.

Al è dificil, parcè che al è un libri scrit tal 2020, an unic te storie de umanitât, e al è peât a un periodi che dal sigûr ducj o vin voie di dismenteâsi o adiriture si sin bielzà smenteâts, e magari a tornâ a visâsi di chê vite che o vin scugnût fâ o che nus àn fat fâ nol è cussì biel.

Ma al è ancje facil, contâus lis robis che a àn puartât a rivâ a cheste publicazion. A son timps lontans, apont, e si fevele di lôr cu la cussience di sei jessûts e la idee, si spere vonde vere, che no tornaran. Nus ven di cjalâ, cussì, dome i aspiets biel dal progjet, che nus àn puartât tes mans un libri di passe 300 pagjinis e che al è, intal panorame de scriture in lenghe furlane, avonde unic, come lavôr.

Ma anin par ordin. Anzit… par capî cemût che al è fat il libri al è biel contâ intal detai cemût che al è nassût,

Si jere jo e Astrid (Virili) no mi visi se ae fin dal 2019 o za a Zenâr 2020. Si jere intune Osterie, forsit Codroip, cui si vise, e si fevelave di cemût meti inpins il strument de newsletter, che il sît di Contecurte nol doprave. E di li, stant che no stoi mai fer, cul cjâf, a son partidis lis ideis.

“Ma ce figade saressie se a mandassin une conte ogni mês ai iscrits?”

“Ma ce figade se e fos une conte lungje, ambientade tal mês”

“Ma ce figade se i metessin dongje un articul che al feveli di une robe dal mês, ce saio, a Zenâr dal pignarûl e vie cussì”

Jo no jeri bon di fâlu, ma Serena (Fogolini) sì e alore o vin tacât a lavorâ par inviâ il progjet, cence  savê ben dulà che nus varès puartât. O vin sielzude come date il 16 dal mês, complean di Contecurte e jo, par scrivi la prime conte soi lât a viodi il pignarûl di San Palai, dongje Tresesin, e di une fotografie emblematiche o ai ancje tirât fûr, la sere prime, un dissen par fâ la cuvierte, che o viodês là in cuvierte.

Insome… Par il 16 o sin saltâts fûr cu la prime spedizion di pdf metût a puest e biel di lei e par dut il 2020, conte dopo conte, articul dopo articul, dissen dopo dissen, o vin metût dongje chest libri, che al è deventât un diari di chel an. Lis contis, di fat, o ai tacât a scrivilis in prese direte, ambientadis tal lûc e tal timp che o vevin ator ator. Al è rivât l’infet, al è lât vie, al è tornât… e lis contis dal mês lu àn compagnât intes storiis, intant che di chê altre bande si contave de part plui didatiche dal lavôr. La prime  conte si clamave Fum, ma ve chi, par fâus subite une idee di ce che al è tal libri, che us lassi la liste dai titui de conte, dal articul e dal argoment tratât.

1. Fum – Cjalant il fum (pignarûl)
2. Len – Gjavât dal len (tomâts)
3. Boris – Boris tal cîl (cidulis)
4. Tiere – Benedî la tiere (rogazions)
5. Butui – Butui di Mai (scjarnete)
6. Jerbis – Di jerbas e di siums (mac di San Zuan)
7. Claps – Dai claps e de cjane (San Ramacul)
8. Pomis – Pomis e sagris (sagris in Friûl)
9. Fros – Fros e soròs (benandants)
10. Piere – Jevâ de piere (Vilie dai Sants)
11. Vues – Un bon vues (purcit)
12. Nêf – Sgrifis te nêf (Krampus)

Ma se tal libri a son ladis a finîle dome lis contis di Raffaele Serafini e i articui di Serena Fogolini, ognidun cu la imagjine di cuvierte e chê di jessude, in blanc e neri, il progjet che al à madracât dilunc dal an al è stât un lavôr coletîf, di tancj de Ostarie Leterarie Contecurte. Pablo (Gortan) al à curât il manuâl par fâ il mac di San Zuan, Ricart e Jacum Tiburzi a àn fat i dissens di jessude, Checo (Tam) al à scrit cualch conte ghost track, Laurinç Marangon al à regalât la taule sul Krampus, Agnul Furlan lis poesiis di Mai, Michêl Londar une interpretazion metude su youtube, Margherite Cogoi la colone sonore de conte dai muarts… il dut metût adun di Astrid (Virili) e regalât in pdf e epub cun puntualitât. E je stade parfin une tredicesime conte. E dute cheste robe no je lade pierdude: cui che al compre il libri al cjatarà un leam segret par viodi e scjamâ dal sît dut il materiâl, viodint ancje lis cuviertis a colôrs.

Il libri al è vignût fûr a Zenâr di chest an, il 2023 e no si podeve spietâ plui, stant che lei di lockdown, di vacine, di drons che a ti corin daûr, di polizie che e da la multe a lis vielis che van in cimitieri… a son robis che nus parin simpri plui incredibilis. E intal meti adun la edizion che o vin fate, doprant Amazon, o vin cirût di cambiâ il mancul pussibil, fasint in maniere che il libri al sedi un biel libri di lei (lis contis) o di consultâ (i articui) ma che al resti ancje gjenuin, e cul spirt dal timp che al è stât scrit.

Cun di plui, lassìn pierdi l’infet e la vite che nus à fat fâ, ma al è stât une vore di fadie rivâ a tignî bot par dut l’an cun contis e articui che a sedin di un nivel bon o almancul plui che suficient. La sielte dai argoments e je stade fate tignint cont di misturâ robe innomenade (benandants, pignarûl, sagris…) cun robe smenteade (la scjarnete, lis rogazions…). E lis contis lis ai scritis cirint di componi un spieli di lûcs e personis che a piturassin intîr il Friûl. I protagoniscj a son fruts, zovins, grancj, vielis… e lis storiis a di davuelzin in mont o inte plane o tal mieç. E ancje se dutis lis storiis a son di fats di realtât, in cualchi maniere o cjatais dentri fantasience e orôr, contis par fruts e scrituris diferentis.

Par presentâlu o vin puartât ator un spetacul che si clamê Il Quiz dai Mês e sul sît o cjatais plui di cualchi croniche.  Cun di plui, o vin metût adun une fase di lanç une vore fuarte, regalant il calendari ai prins che lu prenotavin. Ae fin, a cjalâlu cumò, al è un libri che al è biel vê, e cun dut ce che al à dentri al vâl ben i 15euros che lu vin metût a vendi.

Se us interesse, podês cjolilu su Amazon, o domandâ a mi, gelostellato (gmail) o ae mail di contecurte (gmail).