Volêso un libri di chescj?

Ehi! Ma ce figade ise meti in rie i libris? No come che al devi jessi fâ a tocs un ma forsi la destruturazion e il meti in rie a son musis de stesse tenaie. Ma nol è di tenais che vevi di fevelâ, e a dîle dute nol jere nuie di particolâr di..

O dius, stant che o sin in sdrasse di black vinars, podarè publicâ chest articul a ûs promozion, parcé di no. Vêso voie di vê un Cryptofriûl, o un Bisest, o adiriture un Contis sot spirt a un presit scontât, tipo 12euros cence spesis di spedizion? Benon! Mandait une mail, e la cumbinìn! O magari nin a bevi un schifo che al è ancjemò miôr. Ma po dopo, juste par fevelâ, disin pûr che chê dai libris e je dute une scuse. Cun di plui che cualchidun di chescj ju doprarai par fâiu a tocs e meti adun alc di artistic.

E o pensavi che al devi sei biel eliminâ dut ce si à fat, intune cierte maniere. Cu la cjarte si rive ancjemò, ma cul digjitâtl mighe si rive plui. Cheste possibilitât di decidi sul nestri cidin, che nus àn gjavade in chescj ultins agns, è à alc di inmagant. Che po, vuê matine o ai fat un lavôr, o ai metût a puest ducj i cd che mi vanzin. Tancj ju ai butâts vie, stant che aromai un cd no sai nancje dulà scoltâlu, ma o ai tignût ducj chei origjinâi, juspe parcè che o vevi spindût bêçs parsore, e ancje chei che a vevin un valôr che al leve plui indevant de materialitât.

E ju ai metût in ordin, ancje. E dopo vêju metûts in ordin, o ai decidût che cence premure ju scoltarai ducj. E o ai scomençât de letare A. Poben… o ai pensât al scancelament di ciertis robis, cui prins doi. Tal sens. Il prin CD al è stât A.C.A.U. la nostra meraviglia, di Gianni Maroccolo. Chel dai Litfiba, si, ma il disc al jere un miscliçot di dute la int che al veve ator (canali, ferretti, fiumani, donâ, agnelli, pelù e v. i.) E dentri, in bande di cualchi cjante che e fâs cagâ (jovanotti, par esempli), mi soi inacuart che e je robe biele. Ma biele eh. E pûr, pûr vint la possibilitât di scoltâ dut, se no tiravi fûr il CD cuant mai varessio scoltât chestis cjantis? E o sin plens di robis cussì, te vite, pensavi scoltant. Robis che nus plasin e che si dismentein che nus plasin, par simpri. 
Cualche volte al capite di tirâlis fûr ma al è un câs.

E la figade e je che al vâl ancje pes robis brutis. Tipo il secont disc al è Aeroplanitaliani, il prin prodrom dal rap, cun Zitti Zitti, che ta chê volte o savevi a memorie. Ben po, al è propite plen di cagadis, e si pues dî che al è invecjât mâl, ma a scoltâlu, cumò, mi soi dit… ma chestis robis cussì cringe, cuant mai lis varessio tornadis a sintî? Al è stât un câs. E no je nancje cuistion di butâsi te memorie, eh. Al è propite un ategjament seletîf… che ogni tant al è biel savoltâ. Cun di plui, cun dut che il disc di Bertallot al fasi cagâ, dentri al è un colp di gjeni tant che Quindici Amandoci, che boh… o ai propi gust di vê svangjât fûr.

Ma ce discors inutil. Al jere juste par dî che o ai un biel armâr cun ducj chescj libris, comprendudis ancje lis copiis di Soreli jevât a mont, che mi soi compradis cuasi dutis simpri cun chê idee de “oblio generator” Ancje par chel stes discors. Se us covente, savês dulà scrivi.

Avonde cussì, voi indevant cul tierç CD, Eat the grip dai Aerosmith, che però al è cuasi fruiât e che no mi darâ nissune sensazion, se no di viodi trop mâl che al è invecjât. O che soi invecjât jo, insome.