Pazience

Il sicari, pognet parsore des lindis, al smicjave la puarte dal om; la crôs dal mirin pontade su la mantie e il respîr a fonts, pasât dal mistîr.
Un scritôr… Mah? Cuissà ce altris trafics che al veve par meretâsi i bêçs di un atentât. In chel paisut, po! Ma a lui no i interessave.
Lu paiavin, al faseve. Stop.
Al veve studiât lis usancis dal obietîf: al saveve che ogni pôc al vignive fûr sul antîl di cjase, a cjalâ la lune, la place vueide, i scûrs suturnis; par cirî la ispirazion, o salacor par pierdile, çupade vie dal telefonut o di une cjiche mâl fumade.
E cumò miezegnot e jere botade. No si intivave plui nissun, pai trois dal borc.
Il colp, cidinât, al foropà la gnot e al sclopà il cûr dal om. Il cuarp, daurman cadavar, al clopà par un marilamp e po al sdrumà denantdaûr, dentri cjase. Fortune mostre! Se i lave di lusso lu varessin cjatât doman matine.
Il sicari al gjavà de sachete il telefonut criptât e al clamà.
Il Consei che al veve decretât la esecuzion, ae unanimitât, al jere ae unanimitât in spiete. E la spiete e durave di agns. A vevin spietât che cualchidun al des lustri al paîs, si fases un non. Sigûr… a speravin un atôr, un cjantant, un balonaro… si saressin contentâts ancje di un politic, ma nuie. Nol saltave fûr nissun. Un paîs di int ordenarie e discognossude.
Fintremai che al rivà chel scritôr. Un premi, doi, trê… Lu vevin seguît cu la anime scocolade e la bavisele intal cûr. E cuant che al veve vinçût pe cuarte volte no si podeve plui fâ di mancul. Bisugnave dâi un ricognossiment. E jere vignude la ore, dopo etis di sotanance, che Roncjis di Sot si metès a pâr cun Roncjis di Sore. A vevin fat fâ subit la targhe, plui biele e su metal plui preseât, doprant metât de IMU.
Il Sindic al poiâ il telefonut e i voi i tacarin a slusî. L’assessôr ai lavôrs publics al fasê un gjest di gjonde e al tirâ une rie su “nuova pista ciclabile”; chel al belanç al spesseâ a meti mans al cont in bancje e bonificâ chê altre metât des tassis. Il Vice Sindic al metè mans al progjet pe inaugurazion in pompe magne de targhe… I caliçs a sghinglinarin niçulâts dal morbin.
Sigûr, al sarès bastât spietâ; timp o tart al sarès ben muart, ma il Sindic, e la Zonte cun lui, no vevin vude pazience.