Mari de gnot

Lôr mi clamin Mari.

Di agnorums, etis sore etis, cuant che a vegnin a figotâsi tal gno grim di scûr, Lôr mi clamin simpri Mari.

Voaltris no mi cognosseis, no mi vês mai capide, ma mi odeais e mi bramais la muart, odeant e bramant la muart ai miei fiis.

Voaltris sentâts denant di un cruscot, di une television, di un spritz, di un ordenadôr, di un plat cjalt e paiât. Voaltris che o varessis la libertât di cambiâ e jessi libars, jessi miôr, alçasi tes ramis nobilis de vite, ma par sflacje, malevoie, stupiditât, incapacitât, mancjance di snait, o vivês ogni dì intun laip di miarde, a lamentâsi di jessi presonîrs, no si sa di cui, intun laip di miarde.

E jo us cognòs ducj, un par un, ancje masse ben.

I miei vues scalembris a son tirâts dongje de vuestre tristerie, de vuestre uce, de cjativerie, de rabie.

La  mê cjar ruane e patoche e je fate cu la vuestre indiference, cul vuestri gjavâsi vie dai fastidis, fintremai che a no son i vuestris.

La mê piel di grispis e cicatrîs e cudui e je cuside cui vuestris judizis, cu lis sentencis, cul vuestri jessi miôr, e salts e onescj e simpri de bande de reson.

E pûr, Lôr, mi clamin Mari e no je peraule al mont plui dolce, no je creature plui amade, come che nol è amôr plui sconfinât e pûr dal gno. E Lôr lu san, che cuant che il mont dai oms ju bandonarà, jo o sarai li, a vierzi i braçs e il grim.

Lôr che a àn imbroiât, ruvinât, spacât, robât, pestât, violentât, torturât, copât.

Lôr, i fîs di Cain, che dome ca di me o cjatin un moment di pâs, te bissebove de anime. Ca di me che no ai mai smenteât ce che voaltris o smenteais ogni dì di plui… Il dûl.

Lu smenteais cuant che “se l’è andata a cercare”, cuant che “uno in meno”, in tal vuestri “buttare la chiave”, e “bisognerebbe torturarli” o “se lo merita” e in chel “ti auguro il cancro” e… No covente che o ledi indevant, no mo? I miei fiis, colâts tal scûr dal vuestri dispresit, ju cognossês.

Ma se jo o soi lôr Mari, la Mari de gnot, voaltris si sêso mai domandâts cui che al è il pari?

 

____________

La “Mari de gnot” e je une figure dal folclôr furlan une vore pôc cognossude, e di fat, dute di costruî. Si cjate une vore pôc, inte leterature. In gjenerâl e je la figure feminine che e corispuint al “on neri” o miôr, al “boborosso”. Une femine viele, brute, vistude di neri cuntun grumalat a sbrendui, amie dai spirts e dai triscj, che e cjate inte gnot il sô ambient e che e mangje i fruts che si intardin ator daspò de Ave Marie. Se no ‘nt cjate si sfante intune nule di cinise. Si cjatin testemoneancis intes contis de cjargne, massime in zone di Scluse e Pesariis. Le ai scuvierte cheste Istât, par câs. E la vision che i jere stade dade intun spetacul mi è plasude e le ai fate mê. Une mari che e ten cont triscj, soredut cuant che a vegnin bandonâts, se i va ben, e se i va mâl maltratâts, de socialitât. Jo no soi religjôs, ma un dai valôrs unics, e forsit il plui rilevant, de religjon cristiane al è chel dal dûl. Il dûl che al è discomparît e al discomparis ogni altre di di plui. Une malatie che podês clamâ justizialism, e la Mari de gnot, cun cheste tristerie, no à nuie a cefâ. Cussì e je saltade fûr cheste conte. Il dissen, stant che no si cjatave nuie, lu ai fat jo.