Nol è viaç che no si traviersin frontieris – politichis, lenghistichis, sociâls, culturâls, psicologjichis, ancje chês invisibilis che a dividin un borc di un altri inte stesse citât, chês jenfri la int, chês intorteadis dentri dai nestris infiers che a sierin la strade al nestri jessi. Scjavaçâ frontieris; ancje amâlis – parcè che a definissin une realtât, une individualitât, i dan forme, salvantlis in chest mût dal indistint – ma cence idolatrâlis, cence fâlis deventâ divinitât che a vuelin sacrificis di sanc.

Savê che si plein, provisoris e svoladis, cuntun cuarp uman, e par chel meritevulis di jessi amadis; mortâls, tal sens di sometudis ae muart, come i viazadôrs, e no rimpin e cause di muart, come che invezit tantis voltis son stadis.

Viazâ no vûl dî dome lâ di chê altre bande de frontiere, ma ancje scuvierzi di jessi pûr simpri di chê altre bande. In Verde acqua Marisa Madieri, tornant a cori dilunc la storie dal esodi dai talians di Fiume daspò de Seconde vuere mondiâl, intal moment dal riscat dai Sclâfs che ju oblee a lâ vie, e scuvierç la divignince in part sclave de sô famee in chel moment angariade dai Sclâfs par vie che e jere taliane, ven a stâi che e scuvierç la partignince ancje a chel mont che la sta menaçant, che al è, in part, ancje il so.

Cuant che o jeri un frut e o levi a cjaminâ ator pal Cjars, a Triest, la frontiere che o viodevi, une vore di dongje, e jere invalicabile, – almancul fin ae roture fra Tito e Stalin e ae normalizazion dai rapuarts fra Italie e Jugoslavie – parcè che e jere la Cortine di Fier, che e divideve il mont in doi. Daûr di chê frontiere a stevin insiemi il discognossût e il cognossût. Il discognossût, parcè che là al scomençave l’inacessibil, inesplorât, menaçôs imperi di Stalin, il mont dal Est, dispès ignorât, temût e dispreseât. Il cognossût, parcè che chês tieris, tacadis ae Jugoslavie ae fin de vuere, a jerin stadis dal Stât talian; o jeri capitât li plui voltis, a jerin un element de mê esistence. Chê stesse realtât e jere insiemi foreste e di cjase; cuant che o soi tornât li pe prime volte, al è stât intal stes timp un viaç tal cognossût e tal discognossût. Ogni viaç al ten dentri, plui o mancul, une esperience di cheste fate: cualchi robe o cualchidun che al someave jessi dongje o ben cognossût si mostre forest e indecifrabil, o pûr un individui, un paesaç, une culture che o crodevin diferentis e estranis si pandin come simii e inparintadis. A la int di une rive, chei di chê altre rive i somein dispès salvadis, pericolôs e plens di prejudizis tai rivuarts a cui che al vîf di cheste bande. Ma se si tache a lâ sù e jù par un puint, misturantsi a la int che e passe e lant di une rive a chê altre fintremai di no savê plui ben di cuale bande e in cuâl paîs che si è, si torne a cjatâ il propri benvolê e il plasê dal mont.